Ulaanbaatar, Mongolia | August 27, 2025

Монгол орны алслагдсан бүс нутгуудад дэлхийн түвшний хиймэл оюуны боловсролыг хүргэх зорилготой “Үндэсний хиймэл оюуны аян” нь хиймэл оюунаар сургагдсан эхний 500 төгсөгч багш нараа өлгийдөн авлаа.

2025 оны 8 дугаар сарын 22–23-нд өрнөсөн “Үндэсний хиймэл оюуны аян”-ы хүрээн дэх арга хэмжээгээр Монгол орны өнцөг булан бүрээс цугласан 500 багш нар хиймэл оюунд суралцсан тайлангаа амжилттай танилцууллаа. 21 аймаг, 330 сум, нийслэлийн 9 дүүргийн 1420 багш нараас шалгарсан 450 багш, 50 инженер мэргэжилтэн нар төгсөлтийн сертификатаа гардан авч, цаашлаад эх орныхоо 10,000 гаруй сурагчдад хиймэл оюуны боловсролыг хариуцлагатайгаар хүргэх эрхэм үүргийг хүртэв. Дөрвөн сарын турш үргэлжилсэн Үндэсний хиймэл оюуны аян”-ы хүрээн дэх хиймэл оюуны багш бэлтгэх уг хөтөлбөр нь дэлхийн хамгийн сийрэг хүн амтай улсуудын нэг Монголд хиймэл оюуны боловсролыг ардчилан хүртээх зорилготой сацуу хөдөө орон нутаг болон хотын боловсролын ялгаа, дижитал зөрүүг арилгах шинэ шатны эхлэл болоод байгаа юм.

Энэхүү санаачилгын ард Монгол Улсын Цахим хөгжил, харилцаа холбооны дэд сайд асан, AI Academy Asia-ийн үүсгэн байгуулагч Болор-Эрдэнэ зогсож буй. Булган аймгаас гаралтай тэрээр технологийн гарааны бизнес эрхлэгч болсон замналынхаа тухай өгүүлэхдээ：“Би хөдөөний бүсээс гаралтай хүний хувьд намайг мөрөөдөлдөө хүрэхэд хамгийн том гүүр болсон нь боловсрол гэдэгт итгэдэг. Өнөө үед ялангуяа технологи, хиймэл оюуны боловсрол нь нийгмийн эмзэг бүлгийн хүүхэд залууст мөрөөдөлдөө хүрэх дараагийн гүүр нь.” хэмээн Болор-Эрдэнэ ёслолын үеэр онцлов.

“Үндэсний хиймэл оюуны аян” хөтөлбөрийн амжилт нь олон талын түншлэлийн бат бөх сууринаас эхтэй. Монгол дахь НҮБ-ийн Хүүхдийн сан, М банк-ны дэмжлэгтэй уг хөтөлбөр маань хэрэгжсэн нь төр-хувийн хэвшлийн түншлэл улс орны түвшинд шинэ санаачилгыг хэрхэн түргэвчилж болохыг харуулж байна.

Хөтөлбөрийн сургалтын хөтөлбөрийг Кембрижийн их сургуулийн профессор багш нартай хамтран боловсруулсан бөгөөд олон төрлийн хичээл зааж буй багш нарт хүртээмжтэй байдлаар бүтээснээрээ онцлог. Ханбогд сумын Ерөнхий боловсролын I сургуулийн багш П. Солонго ярихдаа:

тохиолдолд ойлгохгүй зүйлс гарсан. Гэхдээ тухайн үе бүрд багш маань маш энгийн үгээр агуулгыг нь тайлбарлаж байсан болохоор бууж өгөлгүй суралцсаар хөтөлбөрөө амжилттай дуусгалаа. Өдөр тутамдаа ашиглах боломжтой хиймэл оюуны хэрэгслүүдийг санал болгоод, хичээлийн хугацаанд дадлага хийсэн нь энэ сургалтын маш том давуу талуудын нэг байлаа.“

Түүнчлэн математик, мэдээлэл зүйн багш Б. Батдулам сургалтыг мэргэжлийн хөгжлийн хувьд ихээхэн үр дүнтэй гэж үнэлэв:
“Хичээлийн хөтөлбөрт багш нарын заавал ч үгүй мэдэх ёстой хиймэл оюуны талаарх үндсэн ойлголтууд, сурах ёстой зүйлсийг мөн практик дадлагуудыг багтааж өгсөн нь сайшаалтай санагдлаа. Хөтөлбөр дуусахад маш олон зүйлсийг сурсан байна. Мэргэжлийн багшийн хувьд өөрийн чадварыг дээшлүүлж чадсан, үр дүнтэй хөтөлбөр байлаа гэж үзэж байна. Шинэ хичээлийн жилээс сурагчдадаа болоод өөрийнхөө хичээл сургалтын ажилд хиймэл оюуны хэрэгслүүдийг нэвтрүүлэх болно.“

Хоёр өдрийн туршид үргэлжилсэн төгсөлтийн арга хэмжээний үеэр 500 багш 16 баг болон хуваагдаж, инновац шингэсэн төгсөлтийн төслүүдээ танилцуулсан бөгөөд үүнд гамшгийн бэлэн байдлын сургалтын цахим платформ, IELTS ярианы бэлтгэлийн сайт, багш сурагчийн хиймэл оюуны туслах зэрэг багтжээ.

Арга хэмжээний үеэр Боловсролын сайд П. Наранбаяр хиймэл оюуны багш бэлтгэх хөтөлбөрийг цаашид модульчилсан сургалтын систем болгон өргөжүүлж, багш нарт кредит цаг тооцдог болгохыг зарлав. Үүнээс харахад, “Үндэсний хиймэл оюуны аян” нь дэлхийн хэмжээнд хэрэгжиж буй хамгийн эрчтэй AI боловсролын санаачилгуудын нэг болж, Монгол Улсыг хиймэл оюуныг албан ёсны боловсролын тогтолцоонд нэгтгэх дэлхийн тэргүүлэгчдийн эгнээнд авчирч байгаа юм.

Зохион байгуулагчид болох AI Academy Asia нь ирэх таван жилд нийт 2,250 багш бэлтгэх зорилт тавьсан бөгөөд эхний 500 төгсөгчөөр дамжуулан 10,000 гаруй сурагчийг хиймэл оюуны боловсролд хамруулахаар тооцож байна. Мөн уг санаачилга нь боловсролын тэгш боломжийг нэмэгдүүлэх өргөн хүрээний төслүүдтэй уялдаж буй. Жишээ нь, охидод зориулсан “Girls Code” хөтөлбөрийг хөвгүүдэд нээлттэй болгож, жендэрийн тэгш байдал, дижитал чадварын ялгааг арилгахад “Үндэсний хиймэл оюуны аян” хөтөлбөр нь дорвитой хувь нэмэр оруулах аж.

Монгол орон даяарх багш нарыг хиймэл оюунд бэлтгэж, практик хэрэглээг онцлон хөгжүүлж буйгаараа “Үндэсний хиймэл оюуны аян” нь дижитал шилжилтийн шинэ загварыг дэлхийн тавцанд харуулж байна. Шинэхэн төрсөн 500 хиймэл оюуны багш нар маань тус тусын шавь нартаа хиймэл оюуны боловсролын хариуцлагатайгаар хүргэснээр Монголын сурагчид хиймэл оюуны хувьсгалыг зөвхөн гэрчлэхээсээ илүүтэйгээр манлайлан оролцох боломж бүрэн бүрдэж буй юм.

Бэлтгэсэн,
М.Тэмүүлэн

Монголын анхны 500 хиймэл оюуны багш: Хиймэл оюуны боловсролд Монгол эрчтэй алхам хийж байна